Ka jingkular Ia u Mynsiem Bakhuid (Ioannis 14:15-21)

Ka Lynnong ba 14 jong ka Gospel u Ioannis ka kren shaphang ka jingpyntngen jong u Jisu ha ki synran jong u, hadien ka jingsngewsih sngewdiaw jong ki na ka daw ka khubor ba ki la iohsngew ia ka jingpynbna jong u shaphang ka jingleitnoh jong u. Kumta kum ka jingpyntngen ia ki, U la kular bad pynshai ha ki ba ka jingleit noh jong u kan wanrah jingmyntoi ia ki. Lyngba ka jingleit jong u, Un lah pat ban don bad ki kham jan shuh shuh hadien ka jingmihpat jong u. Kin lah ruh ban rung ha ka jingiadei ka ba jan bha bad bad u bad kumjuh bad u Blei. Kumta u la batai shaphang kane ka phang naduh ka dkhot ba 1 ter ter haduh kine ki dkhot kiba ngin ia puson lang mynta ka sngi.

14:15 Kane ka dkhot ka batai ia kaei kaba dei ban leh nangne shakhmat Ynda la leit noh u Jisu bad la u Kpa. Ban lait na ka jingsngewkynjah bad ban sngew ia ka jingdon lang jong u Jisu hapdeng jong phi, phi dei ban sumar ia ki hukum jong u.

Ban bud ia ki hukum jong u ka long ka ba eh hynrei ka jingieid jong phi ia u kan pynlong ia phi ban kohnguh bad sumar bha ia ki hukum jong u. Ka jingieid ka dei ban khring bad pynurlong ia phi ban kohnguh ia U bad ia ki jinghikai jong u.

Ki hukum jong u ki kynthup ia ka jingsngewthuh bad jingpdiang ia ki jinghikai jong u baroh bad ban pynurlong bad pyrthuh bud ia ki ha ka jingim jong phi kaba man la ka sngi. Ka jingleh jong phi kumta kan pynpaw ha ka pyrthei ba phi dei ki synran jong u.

14:16-17 Dei lyngba ka Jingieid ba u Jisu u long ha u Kpa bad u Kpa u long ha U. Lyngba u Mynsiem Bakhuid baroh Ar kin long bad sah ha phi lada phi iaisah bad ki. Kumta phi shem ha kane ka dkhot ba u Jisu u kular ba un kyrpad ha u Kpa jong u ban phah ia u wei pat u Mynsiem Bakhuid u ban don bad sah bad phi shijunom.

Ki kyntien “Mynsiem Bakhuid” la shim na ka kyntien Greek “paracletos” kaba mut “u nongiarap bakhraw” lane “u nongpyntngen”. Une u Mynsiem bakhuid u ba dei u wei pat u ban shim ha ka jaka jong u Jisu hadien ka jingleitphai jong u sha u Kpa (cf. 16:7), u ban pynshai bad batai ia ki kyntien jong u Jisu ha phi. U dei u Mynsiem Bashisha u ban ialam ia phi sha ka jingshisha baroh, u ban ieng ryngkat bad phi ha ki jingsakhi jong phi ia u Jisu bad ha kapor ba phi mad ia ki jingpyrshah. U dei u Mynsiem jong u Blei u ba ialam ia ka Balang sha ka jingshisha, u ba pyniasnoh bad pyntylli lang ia ka Balang bad u Blei bad u ba pynpher ia ka jinglong jong ka Balang bad ka pyrthei.

14:17 Kane ka dkhot ka pyni ia ka jingbympdiang jong ka pyrthei ia u Mynsiem Bakhuid namar ba ka pyrthei kam don ka jingaiei ba kynja mynsiem kaba lah ban iarap ia ka ban iohi ia u bad kumta kan ym lah hi ruh ban ithuh ia u. Kumjuh ruh namarba “ynda wan u Mynsiem bakhuid un pyni ha ka pyrthei katno ki bakla shaphang ka pop, shaphang uno u badei, bad shaphang ka jingbishar u Blei: shaphang ka pop, namarba kim ngeit ha u Khrist;….namarba ia u syiem jong kane ka pyrthei la lah pynrem (cf. 16:8-11) Kumta dei tang phi ki ba ithuh ia u kiba lah ban pdiang bad namarba une u Mynsiem bakhuid u don bad phi shijunom, u ba iaisah bad phi bad u ba shong ha phi.

14:18   u Jisu u la long u Nonghikai jong ki synran jong u bad ka don ruh ka jingiadei kaba jan bha hapdeng jong ki, ha kaba u Jisu u sngew ia ki synran kum ki jong u hi. Dei halor kane ka bynta ba u Jisu u ong “ngan ym ieh noh Khunswet ia phi” U Jisu u sngewthuh shai ba ka jingleit jong u kan ktah ia ki synran jong u bad kin sngew kumba ki la shah ieh khunswet. Kumta ka jingkren jong u Jisu ka pyntngen shisha ia ki synran jong u. Shuh shuh ban pyntngen ia ki U Jisu u la pynpaw ruh ba un sa wan biang sha ki. Kane ka jingwan jong u Jisu ka thew ia ka jingpynpaw jong u Jisu ia lade ha ki synran jong u hadien ka jingmihpat jong u bad ruh ha ka jingwan biang jong u.

14:19 Kane ka dkhot ka pynkynmaw ia ka jingong u Jisu “nga ngan leit noh, phin iawad ia nga, hynrei phin iap ha ki pop jong phi. Phin ym lah ban leit shaba leit ma nga”(8:21). Kane ka pynshai ba sa tang shipor ka pyrthei kan iohi ia u. Hynrei ki nongbud jong u pat kin dang lah ban iohi ia u ha ka jingim bamihpat jong u ym lehse da ki khmat jong ki hynrei da ka bor jong ka jingngeit jong ki(20:29).

Ka jing ong u Jisu “Bad namarba nga im, phi ruh phin im” ka mut ba ka jingwan biang jong u bad ka jingiohi jong ki ia u kan nang pynsngewthuh ia ki ba kumba ka jingiap kam don bor halor jong u, kumjuh ruh yn ym don mano mano ruh u ban lah ban shim na ki kti jong u bad kumta kito baroh kiba ngeit ha u kin ioh im kum ma u.

 Kane ka lah ban urlong namar u Khrist u ong “nga long ka jingmihpat bad ka jingim. Jar u ba ngeit ha nga un im, wat lada u la iap; bad uta uba im bad bangeit ha nga, un ym iap lano lano ruh” (11:25-26)

14:20 Kata ka sngi ka dei sngi jong ka jingmihpat jong u Jisu. Bad dei ka jingialong kawei hapdeng u Kpa bad u Khun kaba pynurlong ia ka jingmihpat. Kane ka jingiadei jong ki ka long kaba jan bha kaba ym lah ban bthat ne pyndkut. Ynda la poi kata ka sngi ki nongbud jong u Jisu kin tip ia kane ka jinglong jong u Kpa ha u Khun bad u Khun ha u Kpa. Ki synran ruh kin iohbynta lem ha kum kata ka jingiadei hapdeng ma ki bad u Jisu. Bad kane ka jingiadei jong ki bad u Jisu ka ialam ia ki sha ka jingiadei kaba thymmai bad u Blei.

14:21 Kane ka dkhot ka pynshai bad pynsngewthuh shuh shuh ia kaei ka ba la ong ha ka dkhot 15. Sa shisien u Jisu u pynpaw ba uba pdiang bad kohnguh ia ki hukum jong u, dei kiba ieid ia u. Kane ka jingieid jong ki ia u kan pynlong ia u Kpa jong u ban ieid ia ki bad kumjuh ma U ruh Un ieid bad Un pynpaw ia lade ha ki. Ka jingpynpaw ia lade hangne ka thew lehse ia jingpynpaw jong u ia lade hadien ka jingmihpat. Ka jingpynpaw ha ki na kawei ka por sha kawei pat ban sakhi ha ki ba u long u ba im. Kane ka dkhot ka dei ban long ka thong bad ka jingthrang jong ka jingim Khristan jong ngi ba ma ngi baroh ngin lah ban ieid ia u Jisu bad kumta ngin ioh jingieid na u Blei bad na u Jisu kumjuh bad kaba kham khraw ka long ba ngin lah ban iohi ia u Jisu markhmat haba u pynpaw ia lade ha ka jingim jong ngi.

Kine baroh ki lah ban urlong lada ngi pdiang ia u Mynsiem Bakhuid bad lada ngi ailad ia u ban pyniaid ia ka jingim jong ngi namarba u iaisah bad ngi bad u shong ha ngi shijunom.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s